上週見到間Stockport 地區三房千呎ex-council house，位置唔錯，叫價非常合理，租金回報有7%的筍盤。預約睇屋前一日，代理打來話已有幾個offer ，業主要封盤。但我哋極力要求，最終仍可以按原來booking睇屋及出價。
現場所見，發現屋有蹊蹺，於是問問現場那個agent哥哥：「間屋是否非標準物料所建。」
對方答：「間屋結構無問題。」
嗱嗱嗱，英國人「言語偽術」真係有佢一套！聽落去差D被佢蒙混過關。聽完佢個答案，第一個感覺好舒服，但其實係答非所問。
之後做下功課，更發現唔同問題：
1. EPC能源級別良好，但字裡行間，露出端倪，顯示有些物料，與別不同。
2. 間屋係好暖，但外牆
好多位置的厚度卻好唔正常薄。
3. 建築物承重的結構同一般屋都唔同，但當然結構仍係安全。
4. 同一條街40-50間屋，過去20年只有5宗成交記錄，而且全部來自兩間屋。有可能係大部份council house都未私有化；但亦可能係，那些屋因某些原因，好難轉手。
翌日，原先話業主要封盤的那位agent 哥哥打來，問問我哋有無興趣出價。我又再次問同一條問題，佢hold住條線一陣後，答我：「我哋唔能夠肯定間屋係或者唔係標準物料所建，你需要自行搵做survey報告。」
之後我哋又問，咁間屋能否做到銀行按揭？佢就答：「業主接受按揭，我哋有位明星級嘅按揭顧問，佢肯定可以幫你手。」 嗱嗱嗱，又來英式言語偽術：我哋問銀行能否做按揭，佢就答業主接受按揭。
雖然agent唔敢講間屋是不是非標準物料所建，但我哋可以好肯定同香港買家朋友講：係！結論當然係：唔投資，好過錯唔投資。
有些朋友人在香港睇啱間英國屋，想搵人到現場影相拍片，就叫做「睇屋」。或者參攷埋youtube 「磚家」意見，就覺得可以做決定。買屋係重要投資，其實唔應該係咁。
我哋提供嘅，係專業物業顧問和買家代理服務，唔係業餘影相和拍片服務。在英國買屋，買家完全唔需要付代理的服務費，但亦有唔少朋友雖然人在英國，仍願意付款使用我哋嘅服務買屋。我哋亦為到每一宗成功完成嘅交易，同埋成功「叫人唔好買」嘅交易感到自豪！
附註：圖片只作參攷，未必與內文談及之物業有關。
（版權所有，如需轉載，請註明出處）
Comentarios