放假外遊，在荷蘭鹿特丹畀咗5歐羅，入去參觀獨特風格嘅方體屋(Kubuswoningen)。這個建屋概念出自建築師PIET BLOM手筆，每間獨立方體屋就像一棵樹，而整個屋苑就成為一個城巿裡面嘅森林。由於垂直空間部分重疊，聲稱更可以地盡其用喎。每間屋入口位置，都離地面大約2-3米，需要行一段梯樓才能入屋。地面公用空間嘅六角形地磚陣設，亦係心思布局，基本上配合方體屋互相連接嘅概念。雨水渠則沿邊位隱藏，成為設計一部分。外觀當然跨啦啦……
早前有位香港驗樓師用香港嘅睇樓標準，檢驗英國嘅房屋，實在笑死一眾英國街坊。我哋當然亦唔好用英國嘅睇屋準則去評論荷蘭嘅特式房屋。但從實用和生活角度來睇，這類屋除咗「形」之外，住落確實唔太爽。
聲稱垂直空間重疊可以地盡其用，似乎係開玩笑。斜邊結構其實導致室內唔少空間浪費。廚房地櫃除咗放英國三文治、瑞士三角朱古力、同日本飯糰外，基本上一般砂煲罌罉都未必放得落。除咗客廳中間位置可以放兩個真偽文青致愛嘅書櫃外，其他儲物空間都有唔少限制。
室內上落要靠一條又斜又急嘅樓梯，飲多兩杯夜歸、未瞓醒上落樓梯、又或者搬運家具，實在好容易發生意外，如果係長者，更加唔適合屋住。
浴室放唔到浴缸，從馬桶起身，又要小心碰頭。
除頂層外，主要生活空間的窗戶多數朝向地面，陽光難以入屋，不太清楚冬天間屋會否因陽光唔到而特別凍。但頂層位置，日間曬衫，夜間觀星，又確實唔錯。
美其名日「方體屋」，實制係「三尖八角屋」。就如香港某地產當年首創「三角廳」，叫做「鑽石廳」，如出一轍。
Comments