睇樓點解連垃桶都要睇埋?

有朋友經其他代理介紹買咗間Timperley區低水屋,在accept offer 後又搵我哋畀意見。當我哋睇完個垃圾桶後,可以好肯定同佢講,間屋剛剛位於兩個Council邊界位置,但卻屬於Manchester City Council,不能報讀Timperley區校網,對方恍然大悟,結果決定取消交易,真係「多得我哋唔少」!

  講起垃圾桶,Council 會按不同post code在每星期不同日子倒唔同顏色的桶。有時可以係天未光就倒,有時亦會全日無影,倒漏一兩條街唔出奇。以往自己試過二三次,前一晚唔記得拉個桶出路邊,第二朝未瞓醒聽到倒垃圾聲,立即成個人彈起,著住睡衣衝落樓,踢住拖再拉住個桶跑九秒九,追咗架垃圾車五六十米倒垃圾。好在以往在香港做開「追巴士」之類劇烈運動,訓練有素 !

  另外,你買咗或租咗間屋,我哋代收樓後,都會幫你檢查下門口幾個垃圾桶有無寫冧把。由於裝家居垃圾個桶好多戶都係「常滿」,如果個桶無冧把又長期無人拉出拉入,被街坊老笠兼私人化,絕對唔出奇。唔見咗個桶,你當然又要「科水」畀council。搬入屋之後,如果你發現同條街有位鄰居會有兩個桶,就不妨行去同佢打幾聲招呼,吹下水,講完天氣,當然可以請教吓佢點倒垃圾啦。

  最後,Trafford Council會提供廚餘及農務廢料(garden waste)專用的綠色垃圾埇和可降解塑膠袋,以往如果要倒garden waste又要每年另外再畀40鎊錢買張label貼喺個綠桶上面,但近一兩年已經廢除咗。如果唔夠降解袋,可以去圖書館免費索取,又或者試下綁個降解袋喺個綠桶上面,倒垃圾工人見到就會送你一卷。(如果你運氣唔太差的話)


(版權所有,如需轉載,請註明出處)