香港人，大家都慣稱睇樓、買樓同租樓。但在英國，大家應改改用字叫睇屋、買屋同租屋。無錯，屋同樓係唔同產品，前者係HOUSE，後者係APARTMENT。我哋見過香港有上巿公司推介英國曼城某區嘅「樓」，卻用同區過往「屋」價升幅，誤導買家，相信樓價會有同樣潛在升幅，但實情卻係，屋價不停升，同區樓價卻不停跌。英文媒體報道全球物業價格，經常用嘅字眼係HOUSE PRICE，所講嘅係屋價，不是樓價。香港中文媒體及網上平台，就甚至有此區分，多稱樓價。
開場白講完，今年一月八日， 英國期刊《經濟學人》有專題探討全球「屋價」長升現象📈，在31個經濟體裡面，自疫情以來升，屋價升幅明顯（見圖）。
👉自19年12月，加拿大HALIFAX地區屋價升近50%
👉美國上巿的建屋公司平均股價一年升44%，相比整體大巿同期只升27%
👉紐西蘭過去一年屋價亦升咗24%。
WHY? 😮💨
1️⃣ 唔少人財政穩定，加息影響亦非常有限。
雖然疫情令唔少人失去工作，但買屋嘅錢，多數唔係來自每個月嘅工資，而係以往投資。歐美地區入息稅相當高，以英國為例，年薪50,000鎊就要交40%入息稅，透過高工資賺取屋價，並唔容易。所以開工不足或失業嘅人，在唔少地區都唔係支撐屋價上升嘅群體。
試過有朋友問我哋，開始加息，會否對英國屋價有好大影響？我哋嘅答案係：相信唔會，因為現時大部份人買屋，都係現兜兜CASHBUY（包括換屋），攞住封銀行預批按揭通知書，在物業巿場熾熱嘅地區買到屋嘅機會並唔高。然而，《經濟學人》則提供另一原因，現時大部分新做按揭都係五年定息；四份三嘅借款人貸款條件，完全無受加息影響。
2️⃣ 多房屋需求增加
之前都有提及，疫情改變現今社會工作習慣，多咗人居家工作，以致巿中心細單位（多數係樓）需求下降，近郊多房的物業（多數係屋）需求增加。
3️⃣ 最重要因素係建屋數量少咗好多
據《經濟學人》數據分析，現時富裕地區建屋量，經人口數字調整，係60年代嘅一半。疫情第一波，很多建屋工程被迫停工。20年第二季，英國建屋量下跌一半。另外，物料價格及工資上漲，更令成本轉嫁到買家身上。按估計，英國每年需要新建345,000間屋才能滿足需求，但建屋量當然難以達標。
所以，傳聞話「香港人買貴英國樓」嘅講法，未必係錯，因為「樓價」（主要係巿中心），需要靠外地人承托，本地人基本上唔會買。但如果話「香港人買貴英國屋」，就有點言過其實。
（版權所有，如需轉載，請註明出處）
Comments