年多以來，不停有業主朋友向我哋查詢關於2025年英國出租物業能源效益 (EPC) 需要達C級或以上才能出租嘅問題。有不少提升EPC嘅公司不停助攻🤥，宣傳有關政策，叫人盡快幫襯佢哋。⚡
2021年Glasglow舉行全球氣候會議，英國政府之前推出咨詢文件，「建議要求」於2025年，私營出租住宅物業（domestic private rented sector properties，簡稱 PRS ) 其能源效益需要達Ｃ級或以上。自此，不少中英文網頁、KOL 同YOUTUBER 都跟車太貼，當係已經落實嘅政策大肆宣傳。但實情係，有關建議於2021年完成咨詢階段，致今仍未有定案。
現在睇番官方公布資訊，就長遠私營出租住宅物業能源效益嘅目標係：如果可行、合乎成本效益及可負擔的話，於2030年前將EPC提升到C級的房屋越多越好🏠 ( as many of them as possible to be upgraded to EPC Band C by 2030, where practical, cost-effective and affordable)。
咁我都知故事說得越動聽越好。英國人嘅語言「偽術」大家唔係未見識過。認真睇practical, cost-effective 同 affordable 三個字，就明白不要太認真！
👌Practical可行性👌
政府咨詢文件指出， 現在英格蘭地區，私營出租住宅物業中，有3.4百萬間在C級以下，佔全數4.5百萬物業嘅75%，而屬於D級的，則佔50%。8年來要將3.4百萬個物業升級，即平均每年要完成42萬個私人物業，可能嗎？有唔少房屋「年事已高」，需要提升EPC唔係淨係換幾支LED就得。
⚖Cost-effective 成本效益⚖
我哋睇過好幾間代業主管理嘅物業，發現EPC證書上，列出如果要由D提升到C級，需要花費£9,000 至£14,000不等，但每年只能節省大約£350-£420嘅能源開支。唔計任何損耗和折舊，亦未計近年能源費大增，有關投資需要超過30年才能回本，成本效益十分存疑。
要提升EPC到C級，動輒需要超過£10,000，相等於唔少業主大半年嘅租金收入。試問有幾多業主可以負擔？財困嘅英國政府面對幾百萬間EPC D級私人出租住宅物業，又唔知有能力承擔多少費用呢？
此外，仍有兩點最吊詭嘅係，第一，講求減少碳排放量，要私人出租物業提升EPC，咁點解政府出租物業，即是Council House卻又無任何要求？道理何在？
第二，上文所言，75%私營出租屋屬D級或以下，但咨詢文件卻同時透露，它們只佔全部家居碳排量14%（PRS properties below EPC C emit around 13mt Co2e annually, equating to around 14% of the whole domestic housing stock）言下之意，是否暗示絕大部分家居碳排量都不是來自私人物業，而是來自屋齡更舊嘅政府出租物業？
曾經聽過有人說，我哋生活於充滿謊言嘅香港社會，唔知如何教育下一代。其實，我哋係生活於一個充滿謊言嘅世界，所以更要教導下一代：最少，不要因眼球被吸引，就信以為真。
資料來源: Department for Business, Energy & Industrial Strategy, UK Government
（版權所有，如需轉載，請註明出處）