收過唔少本地人或持英國技術工作簽證的新移民租客申請租屋，有時見到佢哋嘅收人，真係有點諤然。同樣，見過另一批租客可以攞盡「唔知邊樣打邊樣」嘅福利，佢哋嘅收入，更加讓人諤然。
從南亞或非洲地區請來的新入職醫生，月薪只有£2,500左右。最驚訝嘅係，見過一個超過10年經驗的NHS顧問級外科手術醫生做擔保人，佢嘅人工竟然唔夠£6,000。唔好忘記，扣埋稅，落袋得幾多，大家心中有數。
現時英國初級醫生發起擺工，見到有標語聲稱苦讀六年醫，欠債過£100,000 ，時薪得£14。有位前NHS 醫生叫Adam Kay，2010年因見到英國醫療制度的問題，決定背負父母意願，放棄醫生工作，還寫咗本書 “This is Going to Hurt: Secret Diaries of a Junior Doctor”。裡面提到佢有日發現自己日做夜做，平均時薪竟然低過路邊「企直」嘅泊車咪錶。又有一次，佢好奇點解病房內每個病人心跳都係60，於是細心留意下個姑娘點計心跳，結果發現，原來佢每次都係數緊每分鐘有幾多秒。
英國政府每年的醫療開支，2000年佔GDP7.2%一直升致2009年佔GDP9.9%，其後一直保持差不多比例到疫情前。不過，受全球疫情影響，過去兩三年大幅攀升到12%。
每個政府，從來都不斷面對各種兩難嘅決定，只有在選舉之時，大家都會各出其謀，讓選民相信自己係魔術家，可以加福利又唔加稅，致於錢點來？欠債、惡性通脹之類咁掃興嘅問題，當然暫時唔好提。「出來行，預咗還」嘅道理，大家都明，問題係邊個找數而已。
photo credit: Mark Thomas/ Alamy Live News/ Statista.com
Comments