日前外出散步，見到有間屋嘅工程進行中。本來無乜特別， 但定一定神，突然醒起間屋其實三至四個月之前已經開緊工。事隔幾個月，似乎外觀無乜大進展，樓上同樓下嘅窗都係未裝，但當時起碼未拆簷篷。
我哋唔認識間屋嘅業主，亦唔知道背後嘅故事。但確實為到這位街坊擔心，恐怕又出現另一死拖難拖嘅工程，完工遙遙無期。有唔少裝修判頭，同時會有幾個地盤開工之餘，還會繼續接新工程，所以爛尾或死拖的故事大家都聽過唔少，但錢又要求要收到足，而唔覺得自己有問題。所以，有些「磚家」教人買間爛屋翻新再轉售，道理其實好簡單，但搵錢過程並非想像中咁容易！
我哋最近，亦處理咗幾宗香港業主朋友嘅裝修爛尾工程，好明白佢哋嘅心情。有個別個案，業主搵咗啲平時相信係做開單項工作嘅師傅做全屋裝修，初時乜到話得，乜到話可以，但相信佢哋可能以往唔係住英國，除咗對英國房屋結構唔多了解外，對工程項目管理亦無乜經驗，結果程序嚴重出錯。例如未走晒冷熱水喉和電線，就先鋪好晒一樓木地板；明知廚房後面會做擴建，抽油煙機嘅出風位照爆窿直出；還有企缸側面生口位全鋪瓦仔封死；車房部份位置得單層磚亦無加番內層磚和保溫物料。結果業主朋友同佢不歡而散，要另外搵人處理善後工作。
（版權所有，如需轉載，請註明出處）