早前順利幫幾位在香港和英國嘅朋友，完成買屋交易，隨即可以推出巿場。暑假期間，租務需求熾熱，其中一個物業廣告一出，24小時內收到超過35個要求睇屋嘅查詢。除咗本地人，其實亦有唔少來自其他國家的新移民。
新到埗人士，按理沒有英國信用記錄， 一般本地AGENT 都會要求他們一次過繳付半年租金，如此條款，對大部分香港朋友當然唔係問題，但對於來自較貧困國家嘅新移民，確實相當吃力，佢哋更加無咁多FACEBOOK群組嘅資訊，所以搵屋同樣處處碰壁，失望至極。
好幾位善心嘅業主朋友，都接納我哋嘅建議，將間屋租畀來自南亞地區從事醫護工作嘅租客。因對方有工作合約，且其工作性質對社區帶來重大貢獻，盡早讓他們安頓及解決住屋問題，實在可以令更多本地居民間接得益。我哋亦額外提供一大堆實用資訊，提示他們如何處理各種帳單登記。業主朋友們因著他們的情況，更同意免除他們一次過預繳半年租金嘅條款。
幾個租客得知我哋嘅安排，實在感動至極，言詞之間更流露出難以形容嘅喜悅！租過屋嘅香港朋友，大家都會明白的。
（版權所有，如需轉載，請註明出處）
Comentários