聽過唔少朋友在香港買英國屋，只係搵英國朋友睇屋拍片影相，背後好多明顯嘅問題並沒有留意，要等到出咗驗屋報告才知悉。但當然，亦見過一些驗屋報告所提出嘅問題，其實亦唔係大問題，唔了解嘅話，買家會好疑惑。
今次講講睇屋見到外牆紅磚嘅唔同狀況，其實背後反映咗唔同問題。
如果磚紋不對位，或新舊不一，好大機會代表曾經有過改動，例如封咗道窗或門位。近地下位置經常會見到一些「疏氣磚」（airbrick）其作用係讓間屋下面嘅木結構可以通風。如果木結構長期濕潤，好易會有蟲蛀。有些人會因不同原因將疏氣磚封掉，其實這樣係會增加間屋發潮嘅機會。不過，如果你間屋無疏氣磚，又唔駛太擔心，因為可能係鋪咗水泥地基，所以就無需要裝疏氣磚通風。
近地面位置，有時又會見到一排排細孔。這些都係處理屋內牆身發潮的方法。舊式的做法會將一些化學物質注入磚內，較近年的做法會注入磚與磚之間的水泥位置。
有時見到，一排排細孔平均分布在整幅外牆嘅水泥位置，這代表牆身曾經注入保溫物料以增加能源效益。當然，如果一排排細孔水平分布在磚中間，卻又代表可能係結構加固工程。
如果見到垂直磚縫深淺色不一或者密度不同，這有可能係沉降現象。但附圖中所見，黃框範圍磚縫較為深色，只係上面條雨水渠塞咗，雨水在那個位置滿溢流到牆身，你亦見到隻電視訊號碟垂直位置生鏽，所以好明顯係雨水直流嘅現象。
我哋係大曼城及附近地區提供睇屋同買家代理服務，如有興趣，歡迎WHATSAPP同我哋聯絡。
（版權所有，如需轉載，請註明出處）