租屋服務，收咗鎖匙，入屋檢查，發現浴室洗手盆熱水水壓明顯較低，唔正常！原來下面條水管摺咗，短期內除咗用熱水唔多爽，應沒有大問題，但長時期就唔知會否三更半夜，或外出期間爆喉。
另外，浴室燈其實唔符合防水規格，這個問題，我哋代睇屋時已經發現，但agent大哥話完全無問題，已有安全證書。好，睇睇完張cert，見到有關浴室電力裝置全部寫N/A，即表示浴室完全沒有任何電源，好明顯係錯誤。不過，同一張cert，寫咗沒有Equipotential bonding（大約即是水線無接金屬片）屬於潛在危險項目。但無問題，電工大哥照簽「滿意」，好，咁我無嘢講。
同期，另一間屋，經本地名牌大代理承租，幫租客入屋檢查，睇到張電力裝置證書寫住「唔達標」，之後亦無其他已修妥附頁，裡面潛在危險項目有近10項，另外建議改善項目亦有近10項，今次電工大哥好認真！租客朋友向agent反映有關問題，對方竟然話間屋電力裝置已合乎法例要求，唔會做任何嘢！咁樣嘅回覆，完全令人咋舌。好，我哋轉載政府網頁有關資料，向對方對質，並表示如果堅持無問題，我哋會尋求council意見。就係咁，agent才肯安排修正有關電力裝置安全問題。
睇屋不只是拍片影相，收屋亦唔止攞匙開門。英國經常撞到博大霧嘅本地agent或技術人員（機會率其實唔低），除咗個人工作態度外，另一原因係，租屋買屋，本地agent 只收業主／賣方錢，所以較著重對方利益。
＃英國租屋 ＃曼城租屋
（版權所有，如需轉載，請註明出處）