這三種車速指示牌有乜分別?

一眾到達英國的朋友,解決咗住嘅問題後,就會有好多關於車嘅問題,見到唔少網上資料舛誤甚多,我哋綜合不同個案,討論各種關於駕車的話題。


Q1:到英國前需否先換國際車牌?

無需要。香港車牌可以直接在英國揸車一年,國際車牌必須與原居地車牌一併使用。但租車時,個別租車公司的個別分行又或者個別員工在心情唔好的日子,係會突然叫你提供國際車牌,否則就算有香港車牌,BOOK咗車都唔租畀你。時運高唔好彩,就無話可說。


Q2:否要住185日才可以換英國車牌?

政府網頁第一條問題問Are you a resident of GB? 然後下面有句You’re normally a resident if you live in Great Britain for 185 days in each calendar year. 住185天正常就係英國居民,但唔代表要住185天才能成為英國居民,因為持有效居住簽證入境者(例如BNO VISA、工作簽證),入境當日,已有居民身份,所以可以即時換英國車牌。


Q3:香港P牌可以轉英國牌嗎?

英國P牌係Provisional driving licence, 其實係香港的L牌(給予學車人士使用),駕駛時需要有指導員。香港的P牌係Probationary driving licence,係可以在沒有教車師傅的情況下駕駛,只是限制需要掛P牌、最高車速行70KM/H,同埋不准行高速公路最右邊快線,限制期為一年。所以,香港P牌在英國來說亦係正式Full licence,可以直接轉換。


Q4:如果無香港車牌,是否可以一到埗馬上學車?

唔可以。英國學車要先申請P牌,但P牌其中一個申請條件,是要在過去12個月,在英國合法居住185天。


Q5:搬一次屋要轉兩次地址?

如果搬咗屋,大家當然知道需要同DVLA轉地址。但要留意,「人牌」同「車牌」係需要分開辦理轉地址手續,人牌係指駕駛執照,車牌係指汽車登記證(即香港俗稱叫「牌簿」)。試過有個本地人租客, Credit check 時被查出有法庭欠款記錄,金額只係幾百鎊但佢卻完全唔知情,好大機會係搬咗屋無改車輛登記地址,之後泊車超時被追收罰款不果。錢事少,因此畫花信用記錄事大。


Q6:租車保險

租車如果買全保,一般保費比較高。但在英國,係可以買excess insurance (墊底費保險),以賠償損毀租用汽車的罰款,保費可以係幾鎊一日或者幾十鎊一年,比跟租車公司提供嘅全保保費差好遠。但要留意條款,一般需要英國居民身份,以及不承保一間「出晒名」(infamous) ,花名叫做Greed Motion的租車公司。


Q7:車速限制

英國Motorway正常情況的車速限制係70m/h,但間中會見到電子顯示牌出現較低的車速數字,有時有個紅圈,有時無紅圈,有乜分別? 其實如果有紅圈,代表強制性車速上限,而沒有紅圈就是因天氣或路面情況而建議的車速上限。還有一種較少見的藍底白字車速指示牌,係表示最低車速要求,一般會在隧道內出現。




(版權所有,如需轉載,請註明出處)