唔少人擔心曼城和其他英國大城巿治安，尤其是爆格案頻生，我哋綜合多年來聽過唔同受害人的經歷，提供以下防爆資訊，真心希望可以幫助每個移居英國生活的家庭。爆得你間屋，唔會係白撞，之前踩晒線做足功課，亦隨時同一條街一次過爆幾間，合乎「成本效益」。賊佬有腳，唔好認為有些地方比較好，就疏於防範
靚車泊門口 英國BENZ、寶馬相比香港唔貴，唔少人會覺得好抵玩，所以買部二手靚車，門口泊部靚車，係會增加被爆格風險。有些個案，賊佬半夜入屋擸走車匙偷車，前後只需要一兩分鐘。所以，晚上車匙最好放樓上房間，唔好放一些方便的位置，例如廚櫃第一格櫃桶。
車匙跟身 如果出街，最好帶走所有車匙，萬一被爆，經常係會連車匙都被攞走埋，下次返來偷車。聽過有個case，屋主回家後發現被爆兼唔見車匙，立即揸架車去買軚盤鎖，點知班賊就在後面尾隨，個苦主泊好架車後行入店舖，拎住個新買軚盤鎖出番嚟，就連架車都無埋。所以，如果買二手車，得一條匙或有非原廠匙，雖然有機會係上手跌咗條匙落坑渠，但更大機會係車主曾經被人爆格，無咗一條車匙。有車牌號碼，查冊知道登記地址亦有方法，所以要小心。爆屋的目標，係要偷車。
搵人收信 如果間屋前廊位置(Porch)可以讓人看到屋內有信，一家人去咗旅行三五七日，門口多信，即是告之賊人屋主不在家中一段時間，最好出行前找朋友隔一兩日到你家清理下信件。或者入去睇下電視， 開下燈，拉個垃圾桶倒垃圾等等。
擺空城計 同樣，你亦可以買幾個有時間掣的插蘇頭，接盞地燈或枱燈，每日唔同時段自動開熄燈，甚至開關電視機，擺個空城計。
唔好鎖全部門 你無睇錯，有些門不要鎖。入屋爆，十居其九都係走入後園，扑玻璃門入溫室(Conservatory)，然後再入廳上樓。所以我哋睇樓，會好留意間屋是否與其他鄰居相連，並評估被人潛入的風險。唔使講，後園入溫室道門當然要鎖，但如果有第二道玻璃門入廳，就唔好鎖，因為扑得第一道門，就一定可以扑埋第二道門，你唔鎖就扑少道門，自己揀。
客廳裝鎖門 客廳通往樓梯道木門，可以考慮加鎖，賊人入咗屋，都唔容易上樓。
關好房間窗戶 除咗後門扑玻璃，二樓爬窗入屋亦係常見爆格手法，有時可以係日光日白，但就未聽過會扑二樓玻璃，因為太明顯會被人發現，多數係開咗隻窗，賊人可以爬入屋。
BS3621 這是一種較高規格的鎖芯標準，會有個心型嘜頭鑄在鎖芯面，一般用於通往室外的門鎖，唔容易被人用工具開，買家居保險時，保險公司會問你屋企把鎖有無這個規格。不過，識得開鎖都可以正正經經做個鎖匠，極少聽過有賊係開鎖入屋。
防盜系統 每次睇樓，我哋都會留意間屋防盜系統是否運作正常，外牆掛個盒，亦唔代會套防盜真係work。按我哋經驗發現，粗略估計有一半睇過嘅屋，防盜系統都係流嘅，motion sensor或警報器無電、控制器無set等等。但有些較新係統，屋內會有IP camera 可以接駁手機，其實入得屋爆，一般都會戴手套加笠頭幪面，試個有個個案，屋主從手機見到幾個賊入屋，仲對住個鏡頭同佢揮手。防盜系統在室內裝IP cam，除咗有機會被人hack之外，實質作用真係無乜。裝套會響嘅防盜就比較實際，最好係有燈識閃閃下。
安裝摺閘 英國家居，比較少見有人在玻璃門後面裝摺閘，但如果有摺閘，就算扑爆玻璃都入唔到屋，所以絕對係安心之算，曼城巿中心Oxford Road有間Sainsbury 玻璃門後面都有裝同類摺閘以加強保安。摺閘英文叫Security grilles，有需要可以Google吓 。
實時雲端backup 唔少人work from home, 一旦被爆，部laptop肯定無，部機裡面的重要資料，係有錢都買唔番，所以最好要有實時雲端backup 系統，300鎊左右有2TB終生使用，絕對值得。
家居保險 可以買有content insurance 成分的家居保險，當出現財物損失，可以憑報案編號向保險公司索贘，這都是報警的一個最大用途。家居保險一般唔貴，一年100-150鎊之間，有朋友試過索贘，擔心下年會加保費，但保險公司話佢地唔會「懲罰」無辜的受害者。
本地英國人，成為賊人目標的機會比亞洲人低。唔少賊人認為，華家中多現金、印度人家中多黃金，所以較多選擇亞洲人家庭，而且亦聽過爆完再爆。本地人未必了解這種情況，有時便認為我哋過份憂懼，但事實上，捉到賊肯定係大新聞過有人被爆竊。
(版權所有，如需轉載，請註明出處)