2007年11月見證英鎊由歷史高位每鎊兌HKD16.26，在四個月內急跌到兌HKD10.93嘅水平，跌幅達32%。過去5年，大家都習慣以1:10嘅水平換算英國物價折換港幣嘅價值。近日英國政府公布新的財政預算方案後，英鎊應聲急跌到接近35年歷史低位 ，早幾日亦見過最低兌HKD8:25嘅水平，相比15年前高位跌近50%。
事實上，觀其歷史，在過去200多年中，有100年嘅時間，一英鎊長期兌5美元嘅水平，在1803-1815年英法戰爭期間，一鎊平均跌至兌USD3.6嘅水平 ，但到後期美國出現南北戰爭(1861-1875)，一鎊兌美金就升到$10水平。堅係咸豐年代嘅事，無謂講咁多，但睇番過往50年，英鎊嘅大方向，當然係「拾」級而下，有唔少人已經有心理準備，兌美元會跌到一算水平。但不要忘記， 所有匯價和數據都係相對性，過往50年，雖然主要經濟體係沒有發生重大戰爭，但美元長期濫印，加上貨幣與黃金價格掛鈎嘅「金本位」政策取消，用另一種貨幣衡量一種貨幣價值，可能相比用貴金屬或其他資產衡量，會有唔同嘅結論。
舉個例子，美國貨幣量化寬鬆政策期間（直接啲講係瘋狂印鈔年代），香港樓價急升，但相對澳元同黃金，其實同期樓價升幅並非相像中咁驚人。日本大城巿樓價升10%，10年時間都未必得，原因之一，係經濟爆破後日本人本身亦唔會買物業。由以往傳聞樓價需要供三代的歷史，變到無本地人會買，只有海外買家在不明不白的情況下，抱著對未來嘅憧憬去買，但可惜日元匯價跌10%就可以係三個月嘅事。
同樣嘅故事，是否一樣在英國發生呢？其實，英國一樣有些物業，係英國本地人唔會買，我哋每隔一段時間，就會收到一些發展商提供資料，有興趣找我們分銷和推介他們嘅物業，目標買家就大家都明啦。佣金都算唔錯，只係我哋睇完後，從來未向任何朋友推介過。其實，好嘅物業，又邊駛搵海外買家， 或者流到海外呢 ？本地巿場一早就消化晒。
講番匯價問題，睇住英鎊匯價如此跌勢，對未入貨嘅海外買家來說，足以可以抵消屋價升幅，但同樣卻影響將來嘅租金收入。至於長期走趨，只能引用John Keynes嘅名句：In the long run we are all dead.
Photo credit: https://www.exchangerates.org.uk
（版權所有，如需轉載，請註明出處）