top of page

鍋爐(Boiler)或暖板唔著嘅常見原因

  上星期寒流侵襲,大曼城地區唔少地方氣溫跌到零度以下,我哋兩三日內收到唔少業主、租客,甚至同行求助,以解決暖板唔暖、鍋爐(Boiler)唔着、水管結冰、破裂、鬆脫等問題。知道有些屋因住戶外遊、或暫時空置,我哋特意提提各方好友多加留意,甚至代為現場視察。現在綜合各種常見問題,希望可以幫助大家。

 

長期無開鍋爐,之後開唔着

  不論因為能源費貴,還是間屋空置,個別大牌子的鍋爐如果冬天長期唔開,裡面塊風扇板 (Fan Board)係會着唔番,需要更換零件。去年一年內已處理過三宗個案(同係W字頭的大牌字)。所以就算間屋無人住,最好係設定時間制,每日開一至兩次,啟動鍋爐將室內溫度提升。

   另一個可能,係鍋爐安裝在車房內,因保溫較差,溫度跌到低於零度,引致鍋爐下面喉管內的水全部結冰。好彩的話, 用風筒吹融結冰喉管,回復正常水流,一般可以重新運作。不過之後要把下面喉管包番尺寸合適的保溫發泡膠,以免再次出現同樣問題。

 

鍋爐正常運作期間,突然罷工。

  如果鍋爐正常運作,即代表出入的水流正常,突然罷工嘅原因,可能係接駁到室外的排水管銅喉(一般係曲尺形狀)或下面連接的水管裡面有冰塞住,排唔到水的話,基於安全設計,鍋爐會自動停運。

 

廚房廁所有熱水,但全部暖板唔著。

  唔少人家中會有一個調溫器,控制室內溫度。全部暖板唔著,好大機會係調溫器的啟動時間未設定和目標溫度設定得太低。因未夠鐘開機或室內溫度已達標,所以暖板停止運作。

 

 

暖板半塊熱,半塊凍。

  好大機會,係裡面有空氣,需要用一條專用匙扭開暖板上面出氣孔,這個程序叫Bleeding。

 

屋內不同暖板調較同一度數,有些好熱,有些卻唔熱。

  暖板一邊有個可以用手扭的開關叫TRV,另一邊有一個要用鉗扭的開關叫Lockshield,如果一塊暖板開極都唔熱,可以扭大Lockshield(逆時鐘),相反,如果一塊暖板太熱,就可以順時針扭細Lockshield。唔少業主朋友搵咗唔係住開英國的裝修師傅,裝完暖板喉管後就收工,無調較每塊暖Lockshield,出現上述現像就好常見。


  道理上,最近鍋爐嘅暖板(最先熱的暖板)需要將Lockshield較到最細,最遠的,就較到最大,這個程序叫balancing。


做完Bleeding放氣,浴室塊暖板一樣唔暖

  好幾次遇見同樣情況,睇完張相,會同租客朋友講,你塊暖板用電,不是連接鍋爐。浴室外面近地面位置應有個開關未開。

 

室外銅喉爆裂或鬆脫

  水低溫結冰會膨漲,金屬低溫卻會收縮,如果係戶外或車房等空氣溫度較低的銅喉,係會有較大破裂風險。除咗銅喉,接駁位因金屬收縮而引致鬆脫漏水亦會發生。所以,這些位置如更換喉管的話,用膠喉會比較合適,一般生產商仲都話五十年不變保證,十分感動!


(版權所有,如需轉載,請註明出處)

Kommentare


bottom of page